A escravitude, aínda que consentida, segue sendo escravitude!

A explotación sexual das mulleres é un problema serio de desigualdade, fundamentado na relación de dominación masculina e de explotación, levando implícita e explicitamente unha grande carga de violencia de xénero.Vivimos nun mundo en que todo se pode mercar por cartos. O capitalismo neoliberal salvaxe impón unhas pautas de comportamento de sumisión tranversal do pobre sobre o rico, do poderoso sobre o sumiso. E ata a dignidade das persoas pode adquirirse por un puñado de euros. Pero non. As persoas non son mercadorías e a súa dignidade debe ir máis aló das regras do libre mercado. E legalizar a prostitución sería unha conquista máis do grande capital, pois vería lexitimado, aceptado e regulamentado o seu negocio. Que non se deixen enganar aqueles “progres” legalizadores, porque baixo esa máscara de normalización nin tan sequera o máis sagrado do ser humano, que non é outra cousa que a súa dignidade, estaría protexido do mercantilismo puro e duro.Todo está en venda. Todo vale. E no tema concreto, non podemos consentir que a corpo das mulleres sexa un simple produto de consumo no que uns homes, aplicando a lei da oferta e da demanda, teñan a potestade de facer da muller unha escrava. Porque a prostitución é escravitude, non nos enganemos. E aínda que a escravitude sexa consentida, segue sendo escravitude.