MANIFESTO CONTRA O CONFORMISMO

Non sei foi polos incendios ou por ver a realidade deturpada por un vidro dunha redacción. O que si que podo dicir (constatable por calquer tipo de método) é que a xente é certamente egoísta. ¿E por que esta afirmación? Moncho e máis eu sacamos a nosa parte máis radical e eu abandonei por un momento os meus postulados do socialismo democrático para facer de novo un pequeño Manifesto. Chamareino Manisfesto contra o conformismo.
Non me canso de repetir, unha e outra vez, que calquera persoa que se prece e que non teña algún tipo de tara mental debe darse conta de que non vivimos no mellor dos mundos posibles. ¿E cal é a súa resposta?

Un fío de voz tatexo! Porque non é capaz de argumentar porque coño non move un puto dedo para intentar cambiar as cousas. (“por pouco que se poidan cambiar as cousas vale a pena intentalo”). E claro que vale a pena, aínda que moitas veces das moito máis do que recibes. Pero bendita satisfacción dese segundo de placer por ver o teu traballo recompensado.
O dito: as cousas son moi sinxelas. O conformismo do ser humano. E é que me gustaría crer a Rousseau sobre a bondade innata, pero cada vez son máis pesimista. Non digo que haxa que militar nunha fronte, nun partido político, en dúas fundacións, en dúas organización xuvenís, e en 4 asociación culturais para intentar traballar por mellorar as cousas. Non, nin tan sequera creo que a política sexa a única ferramenta.

Pero pouco se fai non facendo nada.


Manifesto contra o conformismo
A totalidade de habitantes do planeta literario, abaixo asinantes.

1- Condenamos a actitude de toda a xente que non fai nada por mellorar o mundo amparándose en maniqueísmos estúpidos.
2- Esculpimos en letras de ouro o seu egoísmo.
3- Sinalámolos co dedo e os miramos con desprezo por tal falta de conciencia comunitaria.
4- Rexeitamos a todas as persoas que viven nunha burbulla ou nun mundo de plastilina que non coincide co real. Pódese ser feliz sen ter que tapar os ollos. E pódese aínda ser máis feliz se observas que as cousas están mal e intentas cambialas.
5- A indeferencia é a ignorancia.

Disposición adicional:
-No caso de darte por aludid@ e querer facer algo non tes máis que aplicar unha serie de máximas. A primeira, a máis sinxela é “pensa globalmente e actúa localmente”; comezar por amañar o que está ao teu arredor estará ben. As restantes virán dadas.


Co puño pechado enriba da mesa e cunha furia que non cabe en min fago un chamamento contra o conformismo. Parémolo.